១.​​ សាវតា

កម្មវិធីពិព័រណ៍ការងារ និងមគ្គទេសក៍អាជីព ត្រូវបានរៀបចំឡើងជាវេទិកាជួបជុំគ្នានៅមួយកន្លែង ដើម្បីផ្តល់ភាពងាយស្រួលក្នុងការផ្សាភ្ជាប់និយោជក អ្នកផ្ដល់ការអប់រំបណ្ដុះបណ្ដាល ជាមួយនឹងសិស្ស-និស្សិត និងអ្នកស្វែងរកការងារ តាមរយៈការផ្សព្វផ្សាយព័ត៌មានស្តីពីឱកាសការងារ វគ្គអប់រំបណ្ដុះបណ្ដាល និងកម្មសិក្សាការងារ ការតាំងបង្ហាញបច្ចេកវិទ្យាថ្មីៗ ដោយគ្រឹះស្ថានអប់រំបណ្ដុះបណ្ដាលវិជ្ជាជីវៈ ព្រមទាំងវេទិកាកិច្ចពិភាក្សាដើម្បីចែករំលែកបទពិសោធ ការប្រឹក្សាយោបល់ការងារ អាជីព និងវិជ្ជាជីវៈ និងការត្រៀមខ្លួនចូលទីផ្សារការងារ ដោយវាគ្មិនល្បីៗ ដែលមានបទពិសោធយូរឆ្នាំនៅក្នុងវិស័យការងារ។ នៅក្នុងព្រឹតិ្ដការណ៍នេះផងដែរ នឹងមានការចូលរួមពីបណ្តាស្ថាប័ន ក្រុមហ៊ុន សហគ្រាស និងគ្រឹះស្ថានអប់រំបណ្ដុះបណ្ដាលធំៗ ក្នុងការចូលរួមតាំងបង្ហាញអំពីតម្រូវការជ្រើសរើសកម្លាំងពលកម្មរាប់ពាន់កន្លែង ហើយសង្ឃឹមថានឹងទាក់ទាញអ្នកចូលរួម និងដាក់ពាក្យរកការងារដែលជាយុវជន និងកម្លាំងពលកម្មវ័យក្មេងរាប់ពាន់នាក់។

កន្លងមក ទីភ្នាក់ងារជាតិមុខរបរ និងការងារ នៃក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំឱ្យមាននូវកម្មវិធីពិព័រណ៍ការងារ និងមគ្គទេសក៍អាជីពជារៀងរាល់ឆមាស សរុបចំនួន ៤លើក រួចមកហើយ ដែលមានអ្នកចូលរួមផ្ទាល់ចំនួន ១១ ៥៧២ នាក់ ក្នុងរយៈពេល ៣ឆ្នាំចុងក្រោយ (គិតពីឆ្នាំ២០២២ រហូតដល់ឆ្នាំ ២០២៤)។

២. គោលបំណង

• ពិព័រណ៍ការងារ និងមគ្គទេសក៍អាជីព ផ្តោតលើគោលបំណងសំខាន់ៗដូចខាងក្រោម៖
• - និយោជកធ្វើការផ្សព្វផ្សាយពីឱកាសការងារ និងតម្រូវការជ្រើសរើសកម្លាំងពលកម្ម ដើម្បីទាក់ទាញអ្នកស្វែងរកការងារ ដែលមានសមត្ថភាព និងសក្តានុពល ជាពិសេសសិស្ស-និស្សិតដែលកំពុងសិក្សា ឬត្រៀមបញ្ចប់ការសិក្សា នៅតាមបណ្តាគ្រឹះស្ថានក្នុងសួនអប់រំបណ្តុះបណ្តាលបច្ចេកទេស និងវិជ្ជាជីវៈរាជធានីភ្នំពេញ នៃវិទ្យាស្ថានជាតិបណ្តុះបណ្តាលបច្ចេកទេស។


• - អ្នកផ្តល់ការអប់រំបណ្តុះបណ្តាលផ្សព្វផ្សាយកម្មវិធីវគ្គអប់រំបណ្ដុះបណ្ដាល ការអភិវឌ្ឍជំនាញផ្សេងៗនិងឱកាសអាហារូបករណ៍។


• - សិស្ស-និស្សិត និងអ្នកស្វែងរកការងារ អាចទទួលបានព័ត៌មានឱកាសការងារ ការប្រឹក្សាយោបល់ និងមគ្គទេសក៍អាជីព ការងារ និងវិជ្ជាជីវ: ការចែករំលែកចំណេះដឹង និងឱកាសការងារ កម្មសិក្សាការងារនៅតាមស្ថាប័ន ក្រុមហ៊ុន សហគ្រាស និងគ្រឹះស្ថាន ដែលកំពុងមានសក្ដានុពល និងតម្រូវការខ្ពស់។


• - ក្រុមហ៊ុន សហគ្រាស គ្រឹះស្ថាន អាចបង្កើនទំនាក់ទំនង ដើម្បីស្វែងរកដៃគូសហការពាណិជ្ជកម្ម និងចែករំលែកនូវព័ត៌មានអំពីតម្រូវការ និងការផ្គត់ផ្គង់ជំនាញក្នុងទីផ្សារការងារ។


• - សម្រាប់ឆ្នាំនេះផងដែរ ពិព័រណ៍ការងារ និងមគ្គទេសក៍អាជីពនឹងមានរៀបចំជា Game Corner ដែលទទួលបានការគាំទ្រពី Job Link។ Game Corner ត្រូវបានរៀបចំក្នុងគោលបំណងបង្កើតសកម្មភាពទាក់ទាញយុវជនក្នុងការចូលរួមក្នុងកម្មវិធីពិព័រណ៍ឱ្យកាន់តែមានភាពផុសផុល ដើម្បីទទួលបានចំណេះដឹង និងការត្រៀមខ្លួនឱ្យបានល្អប្រសើរក្នុងការដាក់ពាក្យស្នើសុំការងារ ក៏ដូចជាការបង្ហាញឆន្ទៈបំពេញការងារ សមត្ថភាព និង សក្តានុពលរបស់ខ្លួនទៅកាន់ចំណោមនិយោជកដែលបានចូលរួមក្នុងកម្មវិធី។

៣. កាលបរិច្ឆេទ និងទីកន្លែង

. ថ្ងៃសុក្រ ១៣កើត ដល់ថ្ងៃសៅរ៍ ១៤កើត ខែពិសាខ ឆ្នាំម្សាញ់ សប្តស័ក ព.ស.២៥៦៨ ត្រូវនឹងថ្ងៃទី៩-១០ ខែឧសភា ឆ្នាំ២០២៥

. ម៉ោង៖ ០៨:០០ នាទីព្រឹក - ១៧:០០ នាទីរសៀល

. អគារ៖ អគារអង្គរវត្ត នៃវិទ្យាស្ថានជាតិបណ្តុះបណ្តាលបច្ចេកទេស (NTTI)

៤. អ្នកចូលរួម

ការតាំងបង្ហាញជ្រើសរើសកម្លាំងពលកម្ម

. ស្ថាប័ន ក្រុមហ៊ុន សហគ្រាស និងគ្រឹះស្ថានអប់រំបណ្តុះបណ្តាលចំនួនប្រមាណ ៣១ ដែលក្នុងនោះព័ត៌មានជ្រើសរើសកម្លាំងពលកម្មមានប្រមាណជាង ៥ ៤០០កន្លែង

. អ្នកចូលរួមទស្សនា (រំពឹងទុក) ចំនួន ៣ ០០០នាក់ ដែលអាចមានអ្នកដាក់ពាក្យស្វែងរកការងារ (CVs) ប្រមាណជាង ៦០០នាក់។

វេទិកាកិច្ចពិភាក្សា ដើម្បីចែករំលែកចំណេះដឹង និងបទពិសោធ លើប្រធានបទស្ដីពី «ការត្រៀមខ្លួនសម្រាប់អាជីពនៅក្នុងសម័យកាលឌីជីថល»

. វាគ្មិនចូលរួមចែករំលែកចំនួន ៤រូប និងអ្នកសម្របសម្រួលចំនួន ១រូប

. សិស្ស-និស្សិត យុវជន និងអ្នកស្វែងរកការងារ ចូលរួមវេទិកាកិច្ចពិភាក្សា ចំនួន ៣០០នាក់។

៥. ដៃគូសហការរៀបចំ

កម្មវិធីពិព័រណ៍ការងារ និងមគ្គទេសក៍អាជីពនេះ នឹងត្រូវបានរៀបចំដោយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ (MLVT) បានសហការជាមួយសហភាពសហព័ន្ធយុវជនកម្ពុជា (UYFC) រាជធានីភ្នំពេញ និងសភាពាណិជ្ជកម្មកម្ពុជា-អ៊ីស្រាអែល ដោយមានការចូលរួមឧបត្ថម្ភគាំទ្រពីស្ថាប័ន ក្រុមហ៊ុន សហគ្រាស និងគ្រឹះស្ថានអប់រំបណ្ដុះបណ្ដាលផងដែរ។